Со 1,69 промили алкохол и без возачка дозвола излетал од патот кај Зрновци, едно лице тешко повредено

Дваесет и четиригодишен возач од виничко е лишен од слобода откако без возачка дозвола и под дејство на алкохол предизвикал сообраќајна несреќа на регионалниот пат Грдовци – Зрновци, во која едно лице е тешко повредено, соопшти Министерството за внатрешни работи.

— реклама —

Несреќата била пријавена на 23 јули околу 3:30 часот во ОВР Кочани. Според информациите од МВР, Д.Н. (24) од селото Градец, управувајќи патничко возило „Опел“ со винички регистарски ознаки, изгубил контрола над возилото и излетал од коловозот.

— реклама —

Во несреќата тешки телесни повреди добил сопатникот С.С. (28) од селото Јакимово, додека возачот и сопатникот Д.А. (28) од селото Истибања се здобиле со телесни повреди. Повредите биле констатирани во Јавната здравствена установа во Кочани.

— реклама —

При увидот, полициските службеници утврдиле дека Д.Н. не поседува возачка дозвола. Дополнително, со извршените проверки било констатирано дека управувал под дејство на алкохол, при што му биле измерени 1,69 промили алкохол во крвта.

— реклама —

По наредба на јавен обвинител, Д.Н. е лишен од слобода, а по целосното документирање на случајот против него ќе биде поднесена соодветна пријава.