„Правдата може да ја одолговлекуваат, ама вистината не“, порача Александар Наунов, татко на загинатата Надица Наунова, пред денешното рочиште за трагедијата во кочанската дискотека „Пулс“, на кое одбраната треба да почне со изведување свои докази и сведоци.
Наунов пред почетокот на рочиштето јавно постави повеќе прашања за кои очекува одговор во текот на доказната постапка на одбраната – за пренамената на објектот, паркингот, минимално-техничките услови и лиценцата со која работел објектот.
„Денес, 1 октомври, одбраната почнува со свои докази и сведоци. Јавно прашуваме кој од нив ќе докаже дека објектот имал законска пренамена, сопствен паркинг и исполнети минимално-технички предуслови? Кој ќе докаже дека лиценцата за салон за теписи важела за дискотека? И кој ќе го оправда непостапувањето на општината, институциите, кои го завија Кочани во црно?“, рече Наунов.
Тој посебно се осврна на обвинетите поврзани со обезбедувањето на објектот, посочувајќи дека, според него, прашањето на нивната одговорност не треба да се сведува на постапувањето откако пожарот веќе избувнал.
„Обвинетите од обезбедувањето не се на обвинителна клупа заради избувнувањето на пожарот, спасување или неспасување, туку дека не ги исполниле обврските кога тоа требало да се спречи. Херојството откако ‘Пулс’ бил во пламен не ја брише одговорноста за она што не било направено претходно“, рече таткото на Надица.
Наунов порача дека семејствата ќе продолжат да го следат судскиот процес и изведувањето на доказите на одбраната.
„Нека носат сведоци, нека одложуваат, но со сведочење нема да направат пренамена со вештачење, а со адвокатски говор лиценцата за салон за теписи нема да стане дозвола за дискотека. Правдата може да ја одолговлекуваат, ама вистината не“, порача Наунов пред денешното рочиште.
