Законот за употреба на јазиците ќе се применува во сите институции каде што се полагаат стручни испити, вклучувајќи го и правосудниот испит, изјави копретседателот на ВЛЕН, Изет Меџити.
Во интервју за „EuroNews Albania“, тој истакна дека за ова прашање веќе е постигнат договор меѓу коалициските партнери во Владата и премиерот Христијан Мицкоски.
„Ние не бараме. Се договоривме со премиерот Мицкоски, а имаше и заедничка изјава меѓу премиерот и двајцата владини партнери за ова“, изјави Меџити.
Тој појасни дека договорот не се однесува само на правосудниот испит, туку на сите стручни испити што се организираат во државните институции.
Според Меџити, со ваквото решение ќе се овозможи граѓаните да ги полагаат стручните испити и на албански јазик, во согласност со Законот за употреба на јазиците и договорот постигнат во рамките на владината коалиција.
