„Со модернизацијата на хидроелектраните го зголемуваме производството на обновлива енергија“, вели Мицкоски

Премиерот Христијан Мицкоски оцени дека модернизацијата на хидроелектраните ќе придонесе за зголемување на производството на електрична енергија од обновливи извори и за проширување на производното портфолио на АД ЕСМ.

Тој посочи дека со проектот за рехабилитација на хидроцентралите ќе се зголеми искористувањето на хидропотенцијалот, а произведената електрична енергија ќе може да придонесува и за секундарно и терцијарно прилагодување во електроенергетскиот систем.

— реклама —

Мицкоски потсети дека за ваква модернизација се разговарало уште во периодот кога бил директор на АД ЕЛЕМ, но дека извесен период немало напредок. Според него, сега раководството на АД ЕСМ, со поддршка од финансиските институции кои обезбедиле средства преку грант и поволен кредит, ќе овозможи реализација на проектот.

— реклама —

„Со самата модернизација практично да се зголеми и произведеното количество електрична енергија, со што ќе се зголеми производното портфолио на АД ЕСМ во делот на обновливата енергија“, рече Мицкоски.

Премиерот додаде дека проектот е дел од определбата на Владата Македонија да достигне нето-нула разлика меѓу произведената и потрошената електрична енергија.

— реклама —

Според него, во изминатите неколку месеци производството се движи над или околу 95 отсто од потребното ниво, поради што смета дека земјата постепено се приближува кон поставената цел.

— реклама —

Мицкоски изрази очекување дека следната година Македонија би можела да има и одредени вишоци на електрична енергија.

„Полека, но сигурно се ближиме кон целта, а тоа е да бидеме нето-нула на крајот од годината. Јас веќе мислам дека следната година дури ќе имаме и одредени вишоци“, изјави Мицкоски.