Со неизвршени контроли овозможен вишок од 56 килограми канабис, кривична против поранешна претседателка на комисијата во Министерството за здравство

Специјализираните полициски служби поднесоа кривична пријава против 39-годишна скопјанка, осомничена за несовесно работење во службата додека извршувала функција во Министерството за здравство.

— реклама —

Од Министерството за внатрешни работи информираат дека НККР Свети Николе до Основното јавно обвинителство во Свети Николе поднел кривична пријава против Д.П. (39) од Скопје поради основано сомнение за сторено кривично дело „несовесно работење во службата“ од член 383-б став 1 од Кривичниот законик.

— реклама —

Според МВР, пријавената во периодот од 18 ноември 2022 до 21 август 2024 година, како претседател на Комисијата за оценување на исполнетоста на условите во однос на простор, опрема и кадар за одгледување канабис за медицински цели при Министерството за здравство, несовесно ги извршувала своите службени должности.

— реклама —

Како што наведува полицијата, иако согласно Законот за контрола на опојни дроги и психотропни супстанции била должна да организира најмалку две контроли во периодот од садење до берба на канабисот, таа не организирала и не извршила инспекциски надзор кај правно лице од Свети Николе кое произведувало медицински канабис.

— реклама —

Во соопштението се додава дека, и покрај известувањата што правното лице ги доставило во текот на 2022 и 2023 година, пријавената не презела дејствија за спроведување на законски пропишаните контроли. Според МВР, со таквото постапување му било овозможено на правното лице да оствари вишок од 56 килограми канабис, што било констатирано со записник од извршена контрола на 19 февруари 2025 година.