Со помош на грчки експерти заврши конзервацијата на фрескоживописот во црквата „Св. Ѓорѓи“ во Курбиново

Министерот за култура и туризам, Седат Сулејмани, и министерката за култура на Грција, Лина Мендони, ја посетија црквата „Св. Ѓорѓи“ во Курбиново, каде што се запознаа со резултатите од завршената конзервација на вредниот фрескоживопис.

— реклама —

Како што информираат од Министерството за култура и туризам, конзерваторските активности биле реализирани со стручна поддршка од грчки експерти, во соработка со Националната установа Завод и музеј – Битола. Грчките експерти биле ангажирани врз основа на Меморандумот за соработка со Европскиот центар за византиски и поствизантиски споменици.

— реклама —

За време на посетата, на министерката Мендони ѝ биле презентирани културното и историското значење на црквата, како и природните и културните вредности на Преспанскиот Регион и нивната улога во поврзувањето и соработката меѓу двете земји.

На средбата присуствувале и директорката на Заводот и музеј – Битола, Маргарета Спасов, како и претставници на Европскиот центар за византиски и поствизантиски споменици.

— реклама —

Министерот Сулејмани истакнал дека завршената конзервација е конкретен резултат од размената на знаења, искуства и експертиза меѓу стручните лица од Северна Македонија и Грција. Тој ја нагласил и важноста на посетата на грчката министерка како потврда за посветеноста на двете земји на унапредувањето на соработката во културата и заштитата на културното наследство.

Црквата „Св. Ѓорѓи“ во Курбиново е значаен споменик на средновековното културно наследство и едно од највредните сведоштва на византиската уметност од XII век во земјава. Таа претставува важен дел од културното наследство на Преспанскиот Регион и пример за улогата на културните споменици во поврзувањето на институциите и народите од двете страни на границата.