ВМРО-ДПМНЕ преку соооштение соопшти дека Владата во изминатите две години спровела значајни реформи во јавната администрација со цел создавање професионален, ефикасен и модерен јавен сектор кој, како што наведуваат, ќе биде вистински сервис за граѓаните.
Според партијата, најзначаен резултат од реформскиот процес е усвојувањето на Законот за административни службеници, Законот за вработените во јавниот сектор и Законот за стручно усовршување и обука на административните службеници.
Од ВМРО-ДПМНЕ оценуваат дека со овие законски решенија се воспоставува современа и стабилна рамка за поефикасно функционирање на јавната администрација, заснована на професионалност, отчетност, стручност и обезбедување поквалитетни услуги за граѓаните.
Во соопштението се наведува дека Владата работи и на подобрување на статусот и условите за работа на административните службеници, при што преку дијалог со синдикатите и колективните договори е постигнат договор за континуирано зголемување на платите за 40 проценти до 2028 година.
Од партијата истакнуваат дека овие мерки не претставуваат само законски измени, туку конкретни политики насочени кон подобрување на животниот стандард, мотивацијата и професионалниот развој на вработените во јавниот сектор.
ВМРО-ДПМНЕ додава дека нивна определба е јавната администрација да биде ефикасен, транспарентен и достапен сервис за граѓаните, а не бирократска пречка, и најавува продолжување на реформите насочени кон создавање стабилен и европски ориентиран јавен сектор.
