Социјалдемократскиот сојуз на Македонија преку соопштение најави почеток на нова фаза од своето политичко дејствување, претставувајќи ја програмската платформа „Твоја држава, твоја шанса“, која, според партијата, претставува визија за модерна, праведна и европска држава.
Од СДСМ соопштија дека новата платформа се темели на вредностите на социјалдемократијата, подобрувањето на животниот стандард, борбата против корупцијата и продолжувањето на европскиот пат на државата.
Според партијата, платформата нуди конкретни решенија за предизвиците со кои се соочуваат граѓаните, меѓу кои високите трошоци за живот, ниските примања, иселувањето на младите, корупцијата и недоволната ефикасност на институциите.
Во соопштението се наведува дека СДСМ ќе се залага за политики насочени кон повисоки плати, заштита на работничките права, правично оданочување, ефикасна борба против корупцијата, независно судство, поквалитетно здравство и подобро образование.
Партијата посочува дека преку „Скопската иницијатива“ ја потврдува својата улога во поврзувањето на прогресивните политички сили во земјата, регионот и Европа, кои се залагаат за демократија, владеење на правото и европски вредности.
Од СДСМ оценуваат дека европската интеграција не треба да се гледа само како политичка цел, туку како можност за подобар животен стандард, посилни институции и повеќе можности за граѓаните.
Воедно, партијата нагласува дека на државата ѝ е потребно обединување околу стратешките интереси, економскиот развој и европската перспектива, наместо политики кои, според нив, создаваат поделби и ја оддалечуваат Македонија од европскиот пат.
