Министерот за здравство, Азир Алиу, денеска соопшти дека со потпишувањето на договорот за учество во програмата EU4Health, Македонија направила значаен чекор кон приближување на домашниот здравствен систем до европските стандарди и политики.
На прес-конференција, Алиу истакна дека станува збор за најголемата програма на Европската Унија во областа на здравството, која, како што рече, претставува силна потврда за европската перспектива на државата и за довербата во реформите што се спроведуваат.
„Со потпишувањето на Договорот за EU4Health во Брисел направивме важен исчекор за македонското здравство. Станува збор за најголемата програма на Европската Унија во областа на здравството“, изјави Алиу.
Тој нагласи дека програмата отвора можности за реализација на проекти во повеќе области, меѓу кои дигиталното здравство, превенцијата и раната детекција на болести, скрининг-програмите, онкологијата, кардиоваскуларното и менталното здравје, како и зајакнувањето на здравствениот кадар.
Според министерот, програмата располага со буџет од 4,4 милијарди евра, а земјава ќе може активно да учествува во европски повици, грантови, јавни набавки, заеднички акции и партнерства со институции од земјите членки и државите учеснички.
„Договорот предвидува ослободување од ДДВ, царини и други фискални давачки за добра и услуги финансирани преку програмата. Тоа е важно бидејќи европските средства треба максимално да бидат насочени кон реализација на проекти од јавен интерес и кон подобрување на здравствените услуги за граѓаните“, рече Алиу.
Министерот најави дека веќе од следната недела ќе започне следната фаза, која ќе опфати активно претставување на програмата, идентификување на потенцијалните корисници и подготовка на институциите за учество во европските повици.
„Нашата цел е оваа можност да ја доближиме до универзитетите, медицинските факултети, клиниките, болниците, институтите, професионалните здруженија, пациентските организации и сите релевантни чинители во здравствениот систем“, истакна Алиу.
Од Министерството за здравство посочуваат дека остануваат посветени на искористување на европските механизми за унапредување на здравствената заштита и создавање поефикасен, поотпорен и подостапен здравствен систем за граѓаните.
