На денешната прес-конференција, пратеникот Бране Петрушевски повторно се спротивстави на можноста за уставни измени под актуелните услови, оценувајќи дека нивното прифаќање би отворило простор за нови отстапки поврзани со националниот идентитет и историските прашања.
На прес-конференцијата, Петрушевски изјави дека „со уставните измени се отвора Пандорината кутија“, тврдејќи дека таквиот развој на настаните им одговара единствено на Бугарија и на лидерот на СДСМ, Венко Филипче.
Според него, договорот што го потпиша тогашната власт на СДСМ и ДУИ бил „капитулантски“ и, како што рече, претставувал доказ за „потчинета дипломатија“ која била штетна за македонските интереси.
„Првиот чекор се уставните измени, а потоа би следеле национални и идентитетски отстапки, редефинирање на историјата и негирање на јазикот. Сето ова за Филипче е прифатливо без доза на размислување“, изјави Петрушевски.
Тој ги обвини поранешните владини претставници дека носеле, како што рече, „погубни државни договори“ со цел да останат на власт, додавајќи дека актуелната надворешна политика на Владата има широка поддршка кај граѓаните.
„Додека над 80 проценти од граѓаните даваат поддршка на меѓународната политика на ВМРО-ДПМНЕ, специјалниот бугарски пратеник Венко Филипче промовира наредби од Радев кои се косат со македонските интереси“, рече Петрушевски.
Од ВМРО-ДПМНЕ оценија дека ваквите ставови дополнително придонесуваат за пад на довербата во СДСМ, нагласувајќи дека граѓаните веќе ја искажале својата оценка на изборите.
