Сојузната влада на Белгија започна кампања со која ги повикува граѓаните да се подготват за вонредни ситуации. Домаќинствата се охрабруваат да бидат способни самостојно да се справат со кризи најмалку 72 часа, на пример во случај на поголем прекин на снабдувањето со електрична енергија или интернет. Иницијативата, која денес беше претставена, е дел од четиригодишен план на Националниот кризен центар за зајакнување на отпорноста на општеството поради зголемени геополитички тензии и природни катастрофи, пишува VRT NWS.
Официјалните лица истакнуваат дека вонредни ситуации може да се случат „каде било и кога било“, поради што јавноста се поттикнува на поактивна улога во подготовките. Целта е подигање на свеста и учење на граѓаните како брзо и ефикасно да реагираат.
Првата фаза од кампањата е насочена кон помош на граѓаните да пронаоѓаат сигурни информации за време на криза. Бидејќи гласините и дезинформациите во такви ситуации брзо се шират, јавноста се повикува да се пријави на владиниот систем за тревога BE-Alert и во кризни ситуации да ги следи официјалните канали за комуникација.
Сојузниот министер за внатрешни работи Бернард Квинтин изјави дека во последните години се зголемиле ризиците од војна и природни катастрофи. Сепак, нагласи дека целта на кампањата не е создавање паника, туку подигнување на свеста.
„Да се биде подготвен е заедничка одговорност“, порача министерот.
На граѓаните им се препорачува да подготват комплет за итни случаи во домот. Сојузната влада советува домаќинствата да обезбедат залихи за три дена, кои треба да вклучуваат вода, храна која не се расипува, основни медицински материјали, батериска ламба, батерии, готовина и хигиенски производи.
Исто така се поттикнува подготовка на помала „торба за евакуација“ во случај на брзо напуштање на домот. Во неа треба да има основни работи како храна, вода, важни документи, полнач за телефон и прибор за прва помош.
Кампањата со тек на време ќе се проширува и ќе опфати дополнителни ризици, вклучително и нуклеарни инциденти. Ќе бидат вклучени и локалните власти за насоките да бидат прилагодени на секојдневниот живот. Властите истакнуваат дека подобрата подготвеност на јавноста ќе им овозможи на итните служби да се фокусираат на оние на кои најмногу им е потребна помош за време на криза.
