Советниците од СДСМ во Општина Кисела Вода во своето соопштение известија дека поднесоа барање за итно свикување на вонредна седница на Советот, по трагичниот настан на градилиште во кој животот го загуби еден работник, а неколкумина беа повредени.
Во соопштението се изразува длабоко сочувство до семејството на загинатиот работник, а на повредените им се посакува брзо закрепнување.
Советниците нагласуваат дека трагедијата отвора сериозни прашања за безбедноста на градежните активности, почитувањето на прописите и улогата на надлежните институции, поради што бараат итна институционална реакција, стои во соопштението.
Во соопштението се наведува дека на вонредната седница треба да се донесат конкретни мерки, меѓу кои:
формирање независна стручна комисија за проверка на сите издадени одобренија за градба на територијата на општината,
итно воведување мораториум на сите градежни активности до утврдување на безбедноста и законитоста,
целосна транспарентност и јавно објавување на сите документи, дозволи и наоди поврзани со градбите.
Дополнително, се бараат итни мерки за заштита на граѓаните, вклучително проценка и евакуација на лица и објекти во ризик, како и санација на последиците и помош за погодените, стои во соопштението.
Советниците од СДСМ посочуваат дека ова не е политичко прашање, туку прашање на безбедност и човечки животи, и бараат седницата да се одржи без одложување, стои во соопштението.
