На денешната прес-конференција, советничката во Општина Центар од редовите на ВМРО-ДПМНЕ и коалицијата, Катерина Костадинова најави иницијатива за враќање на претходниот ценовник на ЈП „Паркинзи на Општина Центар“ (ПОЦ), обвинувајќи ја локалната власт дека со новите правила им наметнува дополнителен финансиски товар на жителите.
На прес-конференција, советничката Катерина Костадинова оцени дека новиот правилник за паркирање негативно влијае врз граѓаните, бидејќи наместо според бројот на возила во сопственост на едно лице, надоместокот се пресметува според бројот на возила регистрирани на иста адреса.
Според неа, тоа значи дека тричлено семејство кое има три возила регистрирани на иста адреса ќе треба да плаќа значително повисоки износи за паркирање во близина на својот дом.
„Преку новите поскапувања на паркингот за жителите на Центар, тие направија да бидеме туѓинци во своите маала, во сопствените домови“, изјави Костадинова.
Таа ја обвини општинската власт дека со ваквите мерки врши дополнителен притисок врз семејните буџети и најави дека советничката група ќе поднесе официјална иницијатива за враќање на стариот ценовник на ПОЦ.
Од ВМРО-ДПМНЕ велат дека иницијативата е поттикната од бројните реакции на граѓаните и дека нејзината цел е да се намалат трошоците за жителите на Општина Центар.
Костадинова воедно упати критики и кон градоначалникот Горан Герасимовски и СДСМ, обвинувајќи ги за политики кои, според неа, се на штета на граѓаните на Центар.
