Пласманот на шпанската фудбалска репрезентација во финалето на Светското првенство предизвика нагло зголемување на побарувачката за државни знамиња, поради што дел од производителите морале повеќе од двојно да го зголемат производството.
Шпанија в недела ќе игра против Аргентина во финалето на Мундијалот, а на бројни згради низ земјата веќе се истакнати црвено-жолтите знамиња.
Карлос Каселс, директор за маркетинг во компанијата „Screen and Digital Printing“, изјави дека во последните неколку недели биле произведени десетици илјади знамиња.
„Производството е повеќе од двојно поголемо во споредба со истиот период лани, кога немаше големи спортски натпреварувања“, изјави Каселс.
Тој посочи дека европските и светските фудбалски првенства, како и Олимписките игри, редовно предизвикуваат значителен раст на побарувачката за знамиња и промотивни материјали. Според него, компанијата веќе бележи зголемен интерес и во пресрет на Големата награда на Шпанија во Формула 1, која во септември ќе се одржи во Мадрид.
Сличен тренд бележи и компанијата „Имазу“, која произведува знамиња и текстилни материјали за визуелна комуникација. Оттаму соопштија дека во последните недели обемот на работа се зголемил за околу 10 проценти, особено како што шпанската репрезентација напредуваше кон завршницата на турнирот.
Најголема побарувачка има за големи знамиња што ги користат компании, институции и јавни установи во маркетиншки кампањи, а производителите велат дека навреме го зголемиле производството за да бидат подготвени за очекуваниот интерес.
Директорот на саемот „Souvenir Expo Spain“, Фабио Нардела, изјави дека знамињата и репрезентативните дресови се најпродаваните производи во шпанските продавници за сувенири ова лето. Иако нема официјални податоци за продажбата, тој смета дека побарувачката растела по секоја победа на шпанската репрезентација на Светското првенство.
