Споменот на Гешовски потсетува колку скапо чини политиката на омраза, поделби и националистичка пропаганда, вели Филипче

Во Кавадарци денеска претседателот на СДСМ, Венко Филипче, положи цвеќе и оддаде почит на Сашко Гешовски, кој пред 35 години, како припадник на тогашната ЈНА, го загуби животот и важи за прва жртва од Македонија во конфликтот поврзан со распадот на Југославија.

— реклама —

Во објава на социјалните мрежи, Филипче порача дека настаните од деведесеттите години не смеат да се повторат и дека тие претставуваат силно предупредување за цената што ја носат политиките засновани на омраза, поделби и националистичка пропаганда.

„Тогаш, политиките на омраза, националистичката пропаганда и вештачки создадените поделби ја вовлекоа целата земја во воен конфликт и крвопролевање. Овој конфликт не смее никогаш да се повтори и треба да биде постојан потсетник за тоа колку скапо може да чини ваквиот пристап“, наведе Филипче, додавајќи дека во тој период претседателот Киро Глигоров со, како што рече, мудри политики ја обезбедил независноста на Македонија.

— реклама —

Тој оцени дека и денес постојат слични опасни појави, посочувајќи на, како што рече, реторики на омраза, поделби и националистичка пропаганда.

— реклама —

„Денес повторно сме сведоци на вакви опасни тенденции. Христијан Мицкоски систематски го дели општеството, поттикнува тензии, создава конфликти со соседите и шири дезинформации, со што ја загрозува иднината на државата“, истакна Филипче.

Во објавата тој порача и дека СДСМ нема да дозволи, како што наведе, враќање во период на изолација, сиромаштија и поделби.

— реклама —

„Ќе останеме на страната на мирот, единството и европската иднина на државата“, порача лидерот на СДСМ.