Надоместоци без основа, тендери без конкуренција и проблематични испити во Академијата за судии и јавни обвинители

Државниот завод за ревизија констатирал низа неправилности во финансиското и организациското работење на Академијата за судии и јавни обвинители „Павел Шатев“, покажува конечниот ревизорски извештај за работењето на институцијата во 2024 година.

Според ревизорските наоди, надоместоците за членовите на Управниот одбор и Програмскиот совет биле исплаќани во целосен месечен износ, без да се земе предвид присуството на седниците. Дополнително, законскиот рок за завршување на втората фаза од почетната обука на осмата генерација кандидати за судии и јавни обвинители бил пробиен за три месеци, што предизвикало дополнителни трошоци.

— реклама —

Ревизорите утврдиле дека дел од договорите со менторите за практична настава биле склучувани по завршувањето на периодот на менторство, а средства биле исплаќани и на координатори чиј статус не е регулиран со Законот за Академијата. Надоместоци добивале и членови на комисии за оценување на практичната настава, иако таква можност не е предвидена во законската рамка.

Во делот на работните односи е констатирано надминување на законскиот максимум за прекувремена работа без задолжително известување до Трудовиот инспекторат. Во еден случај, на вработен му биле исплатени средства за прекувремена работа во период кога истовремено користел дневници за службено патување во странство и присуствувал на седница во рамките на редовното работно време.

— реклама —

Недостатоци биле утврдени и во материјалното работење, при што не постоела соодветна евиденција за користењето на картичките за гориво. Во областа на јавните набавки, ревизијата констатирала критериуми кои не биле директно поврзани со предметот на набавката, како и случаи на набавка на стоки и услуги без спроведување постапка согласно Законот за јавни набавки.

Извештајот посочува и дека во периодот од 2011 до 2023 година бил користен ист економски оператор преку постапка на преговарање без објавување оглас, без реална конкуренција.

— реклама —

Сериозни забелешки се нотирани и во процесот на полагање испити. Поради нефункционалност на системот за електронско тестирање, по законски измени било овозможено полагање на хартија. Сепак, ревизорите оценуваат дека не постои доволна сигурност во резултатите, бидејќи тестовите не биле сериски нумерирани, а резултатите не се обработувале веднаш по полагањето.

Во извештајот се наведува и дека постапката за прием на 130 слушатели за нова генерација прво била стопирана од Државната комисија за спречување на корупцијата, а потоа дополнително блокирана од Владата, по што конкурсот бил поништен во декември 2025 година.

Поранешната директорка на Академијата, Наташа Габер-Дамјановска, во своите писмени забелешки наведува дека утврдените пропусти не биле резултат на намера за заобиколување на законите, туку на објективни околности, голем обем на работа и недостиг на човечки ресурси. Таа посочува дека во периодот од 2018 до 2024 година Академијата паралелно спроведувала обука за повеќе генерации кандидати, приемни процеси и активности за континуирана едукација и меѓународна соработка.

Ревизорскиот извештај доаѓа во период кога граѓанските организации и стручната јавност подолго време предупредуваат на сериозен недостиг од судии и јавни обвинители, а прекинатите процеси за прием на нови генерации дополнително влијаат врз кадровската состојба во правосудниот систем.