Угледниот спортски портал „Атлетик“ објави рангирање на домашните дресови на сите 48 репрезентации кои ќе настапат на Светското првенство 2026, а најголемо изненадување предизвика пласманот на Хрватска – на последното, 48. место.
Авторот на анализата, Ник Милер, оцени дека „Најк“ направил сериозна грешка, интервенирајќи во препознатливиот хрватски дизајн со црвено-белите коцки.
„Коцките се премали, а белиот дел во средината изгледа како некој да почнал да го уредува дресот на мобилен телефон, па се откажал на половина“, напиша Милер, оценувајќи го како едно од најголемите промашувања меѓу сите репрезентации.
Во самиот врв на листата се најдоа Англија и Бразил, додека за најубав дрес на Мундијалот беше прогласен оној на Гана. Според „Атлетик“, ганскиот дрес, инспириран од традиционалниот текстил „кенте“ и легендата за пајакот Ананси, е храбар, оригинален и визуелно највпечатлив.
Во топ 10 се пласираа и Германија, Мароко, Саудиска Арабија, Шпанија, Австралија, Белгија и Зеленортските Острови. Франција заврши на 15. место, Португалија на 21., а Босна и Херцеговина беше рангирана на 31. позиција.
Рангирањето на „Атлетик“ предизвика бројни реакции кај навивачите, особено поради критиките упатени кон еден од најпрепознатливите дресови во светскиот фудбал – хрватските „коцки“.
