(Видео) „Србија не е во Белград, Србија е во Србија“ – студентите со итен повик по затворањето на гласачките места

Повеќе од 4,35 милиони граѓани гласале на предвремените парламентарни избори во Србија, според последните податоци што вечерва ги соопшти студентската листа „Студентите победуваат“. Нејзините претставници упатија повик до граѓаните да останат во своите градови, да го следат пребројувањето на гласовите и да избегнуваат места со засилено полициско присуство.

„Гласале повеќе од 4.350.000 граѓани. Тоа е последниот податок што го имаме“, соопшти претставничка на студентската листа на прес-конференција по затворањето на избирачките места.

Претходно, студентите објавија дека до 19 часот излезноста изнесувала 66,8 проценти, односно околу 4,31 милиони гласачи. Според нивната пресметка, тоа е речиси половина милион повеќе од вкупниот број граѓани што гласале на парламентарните избори во 2023 година, кога излезноста изнесувала 58,77 проценти.

— реклама —

Станува збор за процени на студентската листа, направени врз основа на сопствен примерок, а не за конечни официјални резултати на Републичката изборна комисија.

Студентите предупредија дека затворањето на избирачките места не значи и завршување на изборниот процес, бидејќи следуваат пребројувањето на гласовите, составувањето записници и предавањето на изборниот материјал на локалните изборни комисии.

— реклама —

„По ваков ден и ваква излезност, не смееме да дозволиме кој било во последните часови да го загрози она за што толку многу се боревме“, порачаа претставниците на листата.

Тие ги повикаа граѓаните да останат во своите места и да им дадат поддршка на изборните контролори.

„Останете во своите градови, бидете покрај нашите контролори, следете што се случува и помогнете секој глас да биде зачуван мирно и достоинствено“, нагласија студентите.

— реклама —

Посебна порака упатија до граѓаните што размислуваат да отпатуваат во Белград.

„Вечерва цела Србија ни е потребна таму каде што денеска гласаше. Србија не е во Белград, Србија е во Србија“, порачаа тие.

Истовремено, ги повикаа жителите на Белград да избегнуваат собирање на локации каде што е забележано засилено присуство на полиција и лица без униформи.

„Ги повикуваме сите граѓани на Белград да не се собираат во близина на местата каде што е забележано засилено присуство на полиција и неуниформирани лица“, соопштија претставниците на студентската листа.

Обраќањето го завршија со повик за смиреност и воздржаност, порачувајќи изборниот процес да се доврши „безбедно, мирно и достоинствено“.

Првите процени за изборните резултати се очекуваат во текот на вечерта, додека официјалните податоци треба да ги соопшти Републичката изборна комисија.