Србија пред гласање: Студентите се надеваат на висока излезност, неизвесност околу резултатите

Десетици илјади граѓани се собраа на белградскиот плоштад Славија на завршниот предизборен собир на Студентската листа, во пресрет на вонредните парламентарни избори во Србија закажани за недела. Според проценката на Архивот на јавни собири, на протестниот собир присуствувале околу 150.000 луѓе, пренесува „Дојче веле“.

Со српски знамиња, песни и пораки за политички промени, учесниците ја изразија поддршката за студентското движење, кое по две години протести и незадоволство од власта влегува во директна изборна пресметка со Српската напредна странка (СНС).

„Сакам нешто да се придвижи, работите да почнат да се менуваат. Не мислам дека кај нас корупцијата може целосно да се искорени, реална сум. Но барем да не биде вака“, изјавила за „Дојче веле“ учесничка на собирот, која тврди дека во приватната компанија каде што работи вработените се изложени на притисоци да гласаат за власта и да присуствуваат на партиски собири.

— реклама —

Во Србија ретко се објавуваат истражувања за расположението на гласачите, а довербата во нив е ограничена. Извори на „Дојче веле“ запознаени со истражувањата оценуваат дека изборната трка ќе биде неизвесна, додека во политичките кругови се разговара и за можноста изборниот резултат да доведе до сложени постизборни преговори.

Покрај неизвесноста, присутна е и загриженост за регуларноста на гласањето. Во извештајот се посочуваат долгогодишни обвинувања за притисоци врз гласачите, купување гласови и водење паралелни евиденции на избирачи. Студентското движење најавува мобилни тимови кои ќе ја следат состојбата околу избирачките места.

„Сега нема време за страв. Изборите апсолутно можат да бидат украдени, но сега нема смисла да размислуваме за тоа. Тука сме и тоа е тоа“, изјавила една од учесничките.

— реклама —

Од говорницата на Славија биле испратени пораки за борба против корупцијата, воспоставување владеење на правото и враќање на довербата во институциите. Студентката на Факултетот за драмски уметности, Наталија Стефановиќ, порачала дека собраните граѓани се луѓе кои „под притисок зацврстиле, а во борбата созреале“.

„Луѓе, мириса на слобода“, изјавил професорот на Сообраќајниот факултет, Александар Чупиќ.

Политикологот Иван Станојевиќ од белградскиот Факултет за политички науки оценува дека студентското движење успеало да разбуди дел од граѓаните од политичката апатија и да ја врати надежта за промени. Според него, високата излезност ќе биде еден од клучните фактори на изборите.

— реклама —

Студентската листа во кампањата се фокусираше на борбата против корупцијата, функционирањето на институциите и владеењето на правото, додека прашањата за Европската Унија, Русија, Косово и Сребреница останаа во втор план, со цел да се задржи поддршката од гласачи со различни политички ставови.

Дополнителна неизвесност предизвикаа и изјавите на поранешниот српски претседател Александар Вучиќ. Тој во една прилика најавил дека ќе им честита на противниците доколку загуби, но во настап на телевизијата „Информер“ испратил поинаква порака.

„Сакам истата вечер да кажам сè најлошо за нив и истата вечер тргнувам во борба против нив! Тогаш ќе видат што се блокади, што се бојкоти и што се други чуда“, изјавил Вучиќ.

— реклама —

На завршниот собир присуствувале граѓани од повеќе делови на Србија, меѓу кои и 75-годишниот Видоје Пуриќ од Лозница, кој изразил уверување дека младите можат да донесат промени.

„На младите светот останува“, порачал тој.

Собирот на Славија поминал мирно, како и претходниот собир на СНС во Нов Белград. Србија влезе во изборниот молк во атмосфера на високи политички тензии, со очекување дека гласањето во недела ќе биде важен тест и за изборните институции и за политичката стабилност на земјата.