Срдановиќ по победата на студентите во Србија: „Важно е веднаш да се знае како ќе ја водиме земјата“

Илија Срдановиќ, кардиолог од Нови Сад и носител на студентската листа, во првото интервју за хрватскиот медиум „Телеграм“ по изборната победа порача дека почитувањето на законите и обновувањето на институциите ќе бидат меѓу главните приоритети на новата власт во Србија.

— реклама —

По убедливиот изборен резултат и поразот на Александар Вучиќ, пред студентската листа, составена од 250 кандидати од различни области, претстои предизвикот ветените промени да ги претвори во конкретни мерки.

Срдановиќ изјави дека веднаш по изборите се вратил на работното место во Институтот за кардиоваскуларни болести во Сремска Каменица. Тој нагласи дека и другите кандидати ќе продолжат да ги извршуваат своите професионални обврски, во интерес на граѓаните.

— реклама —

„Важно е да се знае дека за сите прашања ќе се консултираат стручните лица. За нас е особено значајно формирањето на новата влада да се одвива во согласност со законите и прописите на нашата држава“, истакна Срдановиќ.

— реклама —

Тој најави дека студентската листа ќе изврши притисок за мирно и демократско предавање на власта, со целосно почитување на владеењето на правото. Како еден од главните приоритети ја посочи обновата на државата преку воспоставување функционални институции.

Според Срдановиќ, граѓаните препознале дека листата, на која се наоѓаат 250 стручњаци од различни области, има капацитет да се справи со предизвиците и да придонесе за стабилноста на Србија.

Тој додаде дека новата власт сака да изгради доверлив однос со граѓаните во Србија, но и со земјите од регионот, нагласувајќи дека промените треба да се спроведуваат во согласност со демократските начела и законите.