„Среќен почеток на новата школска година, учете и не го бирајте насилството како решение“, им порача Јаневска на учениците

Министерката за образование и наука Весна Јаневска од ООУ „Киро Глигоров“ во Скопје им посака успешна и безбедна учебна година на учениците, со порака дека знаењето е најголемата сила, но и дека насилството никогаш не треба да биде избор.

— реклама —

„Учете, затоа што знаењето е најголемата сила што можете да ја добиете. Тоа богатство никој не може да ви го одземе. Верувајте во себе и секој ден учете“, порача Јаневска.

Таа ги повика учениците да градат пријателства, да им помагаат на другите и да не ги исмеваат оние што се поинакви.

— реклама —

„Навредите, погрдните зборови и насилството не значат дека сте јаки. Напротив, тие се знак на слабост“, нагласи министерката.

— реклама —

Јаневска упати апел и до родителите да им посветуваат повеќе внимание на децата и заедно со наставниците да придонесат за создавање безбедна и прифатлива училишна средина.

По повод почетокот на учебната година, Министерството за образование и наука и Македонски Телеком најавија и заедничка кампања против врсничкото насилство, насочена кон градење позитивна училишна средина и поголемо единство меѓу младите.

Кампањата ја најавија Јаневска и главниот извршен директор на Македонски Телеком, Горан Марковиќ, пред почетокот на првиот училишен час.