Безбедносно-информативната агенција на Србија (БИА) соопшти дека официјално го советувала српскиот претседател Александар Вучиќ да не патува во Црна Гора поради, како што наведува, постоење на висок безбедносен ризик.
Според БИА, проценката е донесена поради наводни закани поврзани со дејствување на странски служби и криминални групи во Црна Гора. Во соопштението се тврди дека според нивните оперативни информации, Радоје Звицер се наоѓа во Црна Гора, како и дека српската служба не добила безбедносна проценка од домаќинот на настанот, и покрај повеќекратните барања.
Сепак, претседателката на српското Собрание, Ана Брнабиќ, изјави дека Вучиќ нема намера да го откаже патувањето во Тиват, каде што треба да учествува на Самитот ЕУ – Западен Балкан.
„Претседателот дури и не сака да чуе за откажување на патувањето во Црна Гора. Тоа е нешто што вети дека ќе го направи“, изјави Брнабиќ.
Случајот доаѓа еден ден откако на 87 српски државјани им беше забранет влез во Црна Гора по пристигнувањето со чартер-лет од Белград. Црногорските медиуми објавија дека станува збор за лица кои наводно требало да бидат дел од неформалното обезбедување на Вучиќ, додека властите во Подгорица соопштија дека биле проценети како безбедносен ризик и биле вратени во Србија.
Во меѓувреме, црногорското Министерство за надворешни работи порача дека државата ќе обезбеди безбеден и сигурен престој за сите учесници на самитот и ја истакна својата улога како членка на НАТО.
Дополнителни тензии во односите меѓу Белград и Подгорица предизвикаа и медиумските информации дека на дел од црногорските државјани наводно им бил оневозможен влез во Србија на неколку гранични премини, иако за тоа засега нема официјална потврда од надлежните институции.
