Сојузот на синдикатите на Македонија (ССМ) најави дека денес во 11 часот ќе ја блокира Владата со точно 21 синдикален претставник, во рамки на третата активност од втората фаза синдикални притисоци за зголемување на работничките плати.
Претседателот на ССМ, Слободан Трендафилов, изјави дека бројот од 21 учесник е избран согласно Законот за јавни собири, како законски минимум за блокирање институција или сообраќајница.
„Ќе бидеме 21 човек и затоа што некој кажа дека ќе ги заокружуваат луѓето што протестираат и ќе ги оцрнуваат. Не се откажуваме сѐ додека не се зголеми минималната плата на 600 евра и не се зголемат сите останати плати за најмалку 6.000 денари“, рече Трендафилов.
Според него, блокадата е реакција на тоа што Владата и работодавачите не постигнале договор до 31 декември 2025 година за зголемување на минималната плата. Тој посочи дека, иако работодавачите биле подготвени да ги зголемат платите за најмалку 6.000 денари, побарале временски период да бидат ослободени од плаќање придонеси за задолжително социјално осигурување во износ од околу 3.000 денари по работник.
Минатата недела ССМ протестираше пред Собранието на Македонија, а потоа и пред Стопанската комора.
