Сојузот на синдикатите на Македонија (ССМ) апелира до работодавачите доследно да ги почитуваат мерките за безбедност и здравје при работа поради најавениот топлотен бран, со цел да се заштитат животот и здравјето на работниците.
Од ССМ бараат да се намали или, каде што е можно, да се прекине работата на отворено во најтоплиот дел од денот, како и да се обезбедат сите неопходни услови и средства за безбедно извршување на работните задачи.
Воедно, потсетуваат дека треба да се применуваат препораките за заштита од високи температури објавени од Институтот за јавно здравје, со посебно внимание кон постарите работници, хронично болните лица и бремените работнички.
„Здравјето и животот на работниците во услови на екстремно високи температури се од исклучителна важност. Заедничка обврска е да го зачуваме нивното здравје, бидејќи тие се двигатели на општеството“, порачуваат од ССМ.
Синдикатот ги повикува работодавачите да ги третираат работниците како свои партнери и да ги почитуваат нивните права, а работниците да ги применуваат мерките за безбедност и здравје при работа.
Доколку овие права не се почитуваат, ССМ ги охрабрува работниците да го пријават случајот кај својот синдикален претставник, претставникот за безбедност и здравје при работа, Државниот инспекторат за труд или директно до Сојузот на синдикатите на Македонија.
