На едно четиричлено семејство во Македонија во јуни му биле потребни најмалку 68.654 денари за покривање на основните месечни трошоци, покажуваат најновите податоци за синдикалната минимална кошница што ги објави Сојузот на синдикати на Македонија.
Доколку семејството живее под кирија во стан од 60 квадратни метри, потребната сума значително се зголемува и достигнува 84.024 денари месечно.
Во споредба со мај, кога минималната кошница изнесуваше 68.742 денари, во јуни е регистрирано симболично намалување од 88 денари.
Најголем товар за семејниот буџет и понатаму претставуваат храната и пијалаците, за кои се потребни 25.120 денари или 36,6 проценти од вкупните трошоци.
Втора најголема ставка е образованието, за кое се издвојуваат 7.192 денари, односно 10,5 проценти од буџетот. За облека и обувки се потребни 6.511 денари, додека за режиски трошоци, како струја, вода и греење, се предвидени 6.379 денари.
Според пресметките на ССМ, за рекреација и култура се потребни 5.592 денари, за транспорт 5.089 денари, а за ресторани и хотелски услуги 4.131 денар месечно.
Најмал удел во семејната кошница имаат трошоците за комуникации, здравје, лична хигиена и останати стоки и услуги.
