Македонија повторно е рангирана меѓу земјите со најсериозни проблеми во областа на работничките права, покажува Извештајот за 2026 година на Меѓународната конфедерација на синдикати (ITUC), соопшти Сојузот на синдикатите на Македонија (ССМ).
Според ССМ, државата и годинава е сместена во четвртата категорија од Индексот за глобални права, која ги опфаќа земјите со систематско прекршување на работничките права. Од Синдикатот оценуваат дека во новиот извештај се нотирани дополнителни забелешки за состојбите во земјата, што, според нив, укажува на влошување на положбата на работниците и синдикалното организирање.
Од ССМ посочуваат дека во извештајот е забележан случајот од февруари годинава, по одржувањето на масовниот работнички протест, организиран од Синдикатот, кога, како што наведуваат, претседателот на ССМ и членовите на неговото семејство биле изложени на нарушување на приватноста преку објавување снимки на социјалните мрежи.
Воедно, од Синдикатот тврдат дека во извештајот е евидентирано и постоење на таканаречени „жолти синдикати“, како и наводни притисоци врз работниците да се приклучуваат кон такви организации.
ССМ оценува дека ваквите наоди претставуваат сериозно предупредување за состојбата со работничките права и синдикалните слободи во државата и апелира институциите да преземат мерки за подобрување на условите за работниците и почитување на меѓународните стандарди во оваа област.
