Пратеникот од редовите на ВМРО-ДПМНЕ, Малиша Станковиќ, на денешната собраниска седница упати критики кон опозициските пратеници, обвинувајќи ги дека со нивните амандмани го кочат реформскиот процес и усвојувањето на законите од Реформската агенда.
Тој истакна дека законот за кој се расправа бил предмет на широка јавна дебата, вклучително и јавна трибина во Собранието, како и расправа во матичната комисија, каде биле поднесени амандмани од сите парламентарни групи. Според него, дел од предлозите на СДСМ и опозицијата биле разгледани, а одредени и прифатени, но еден од амандманите бил оценет како неуставен.
„И покрај целата дебата и постапка, вие повторно тврдите дека вашите амандмани не се прифатени. Еден од нив е оценет како неуставен и не може да биде дел од законското решение“, рече Станковиќ, додавајќи дека опозицијата настојува да внесе решенија кои, според него, би го отежнале функционирањето на законот.
Тој оцени дека СДСМ не покажува вистинска поддршка за реформите и дека нивниот пристап не придонесува за напредок на европската агенда. „Од Реформската агенда и од вашите најави за реформи нема ништо. Вие ги кочите реформските процеси и барате услови според кои би се спроведувале само кога сте на власт“, изјави Станковиќ.
Во своето обраќање, тој порача дека европскиот реформски процес ќе продолжи и без поддршката од опозицијата, нагласувајќи дека институциите ќе продолжат со работа на законите од европската агенда.
