Стевче Јакимовски бил хоспитализиран во Клиничката болница „Аџибадем Систина“ речиси три недели, од 5 до 26 август, по здравствени тегоби, потврди за „Скопје1“ директорот на КПУ Затвор Скопје, Бобан Утковски.
Според Утковски, на 5 август Јакимовски бил пренесен во приватната болница откако претходно пријавил здравствени проблеми.
„На 5 август 2026 година, по претходно искажани здравствени тегоби и жалби од негова страна, тој беше хоспитализиран во Клиничката болница ‘Аџибадем Систина’, каде што му беше овозможен соодветен медицински третман и здравствена грижа“, изјави Утковски за „Скопје1“.
По завршувањето на болничкиот третман, на 26 август Јакимовски бил вратен во КПУ Затвор Скопје.
Утковски не открива детали за дијагнозата или конкретната здравствена состојба, поради доверливоста на медицинските податоци.
„Како институција, наша обврска е кон секое лице кое се наоѓа во установата да постапуваме одговорно и човечки и, секогаш кога постои медицинска потреба, навремено да му овозможиме соодветна здравствена заштита“, вели директорот.
Тој додава дека институцијата постапила согласно своите надлежности и медицинските препораки.
„Здравјето и човечкото достоинство мора да бидат почитувани без исклучок“, порача Утковски.
Јакимовски, според информацијата што ја потврдува директорот на установата, сега повторно се наоѓа во КПУ Затвор Скопје.
Јакимовски е правосилно осуден на една година затвор за незаконската изградба на општинската зграда во Карпош. Во изречената казна ќе му бидат пресметани и петте месеци што ги помина во куќен притвор.
