Пратеникот на ВМРО-ДПМНЕ, Бојан Стојаноски, оцени дека Македонија успева да ја одржи ценовната стабилност и покрај глобалните економски предизвици, посочувајќи дека последните податоци на Државниот завод за статистика покажуваат најниска инфлација во регионот.
Стојаноски соопшти дека годишната инфлација во јуни изнесува 3,4 проценти, додека во споредба со мај е забележано намалување од 0,5 проценти.
„Особено значајно е што инфлацијата кај храната и безалкохолните пијалаци изнесува само 2,5 проценти, а кај облеката и обувките 2,1 процент. Тоа се категориите кои најдиректно влијаат врз животниот стандард на граѓаните и токму затоа овие бројки се најдобар показател дека мерките даваат резултати“, изјави Стојаноски.
Тој наведе дека Македонија има најниска инфлација во регионот меѓу земјите кои досега ги објавиле податоците за јуни.
Според податоците што ги презентираше, инфлацијата изнесува 3,4 проценти во Македонија, 3,6 проценти во Словенија, 3,9 проценти во Грција, 4,5 проценти во Хрватска, 5,6 проценти во Бугарија, додека во Турција достигнува 32,1 процент.
Стојаноски посочи дека и статистичките податоци од соседните земји кои засега имаат објавено информации за мај покажуваат дека Македонија останува меѓу државите со најниска инфлација во регионот.
„Дека во многу држави инфлацијата останува сериозен предизвик е јасно, но во Македонија се покажува дека со одговорни политики, навремени мерки и стабилно економско управување може да се заштити животниот стандард на граѓаните. Фактите и бројките се најсилниот одговор на сите обиди за создавање лажна слика за економската состојба“, рече Стојаноски.
Тој порача дека Владата ќе продолжи со политики насочени кон одржување стабилни цени, поддршка на граѓаните и поттикнување на економскиот раст.
