Претседателот на Социјалдемократската младина на Македонија (СДММ), Трајче Стојчевски, ја повика Владата да распише референдум на кој младите ќе можат сами да одлучат за иднината на државата и нејзиниот европски пат.
На прес-конференција, Стојчевски порача дека Владата не може да се оправдува со недостаток на средства за организирање референдум, тврдејќи дека во буџетот нема пари затоа што, според него, тие биле потрошени на „криминални тендери“.
„Кога има пари за тендери, за нов авион и за луксузен живот на власта, мора да има пари и за одлука за судбината на младите, на државата и на сите граѓани“, рече Стојчевски.
Тој го обвини премиерот Христијан Мицкоски дека ја води државата кон изолација и дека младите ќе ја платат највисоката цена преку продолжено иселување и неизвесност околу европската перспектива на земјата.
Според СДММ, младите не сакаат некој друг да одлучува во нивно име, туку бараат сами да го кажат својот став за иднината на Македонија.
„Ова не е прашање на една партија или на еден подмладок, туку на сите млади во Македонија. Младите имаат право сами да кажат по кој пат ќе оди државата“, истакна Стојчевски.
Од СДММ порачаа дека младите сакаат европска иднина и ја повикаа Владата да не бега од граѓаните и да распише референдум.
„Младите нека одлучат“, порача Стојчевски.
