Вработените во германската авиокомпанија „Луфтханза“, на повик на синдикатот УФО, ќе стапат во штрајк на 10 април, кој ќе трае од 00:01 до 22:00 часот, при што ќе бидат погодени сите полетувања од аеродромите во Франкфурт и Минхен.
Се очекуваат бројни откажувања и доцнења на летовите, а дополнително на штрајк ќе излезе и кабинетскиот персонал на регионалната подружница „Ситилајн“ на девет германски аеродроми, меѓу кои се Хамбург, Бремен, Штутгарт, Келн, Дизелдорф, Берлин и Хановер.
Синдикатите наведуваат дека до штрајкот доаѓа по неуспешните преговори со раководството, при што големо мнозинство од вработените се изјасниле во корист на ваквиот чекор. Околу 19.000 членови на кабинскиот персонал бараат подобрување на работните услови, додека дел од вработените во „Ситилајн“, која е најавена за затворање во 2027 година, инсистираат на социјален план.
Меѓу клучните барања се подобро планирање на работното време, подолги отказни рокови и нови колективни договори. Од синдикатот оценуваат дека штрајкот можел да се избегне доколку компанијата понудела конструктивно решение во текот на преговорите.
Од „Луфтханза“ истакнуваат дека штрајкот ќе има значително влијание врз патниците, особено во периодот на враќање по велигденските празници. Компанијата додава дека останува подготвена за продолжување на дијалогот и пронаоѓање одржливо решение, нагласувајќи дека штрајковите треба да бидат крајна мерка.
