Четворица странски земјоделски работници загинаа во Италија откако автомобилот во кој се наоѓале бил запален во близина на бензинска станица во местото Амендолара. Италијанската полиција веќе приведе двајца пакистански државјани под сомнение за тешко убиство.
Според локалните медиуми, тројца од загинатите биле државјани на Авганистан, а четвртата жртва била од Пакистан. Еден Авганистанец успеал да се спаси кршејќи го прозорецот на возилото и во моментов е клучен сведок во истрагата.
Пожарот избувнал во близина на бензинска станица, а густ црн чад бил видлив од голема далечина. По гаснењето на огнот, пожарникарите во возилото ги пронашле телата на жртвите.
Снимки од надзорни камери, според истражителите, покажуваат дека две лица ги блокирале вратите на автомобилот однадвор, додека во возилото била истурена запалива течност. Набргу потоа автомобилот бил зафатен од пламен, а осомничените избегале.
Обвинителството во Кастровилари наредило апсење на двајцата осомничени, на кои им биле на траг влезени токму преку снимките од безбедносните камери.
Преживеаниот сведок изјавил дека од април работел на берба на јагоди заедно со загинатите колеги. Според неговото сведочење, тие биле превезувани од истите лица кои сега се осомничени за нападот.
Тој тврди дека работниците не ја добивале договорената дневница, а од нив дополнително биле барани пари за превоз. Наводно, конфликтот избувнал кога работниците одбиле да платат дополнителни трошоци.
Сведокот изјавил и дека наводно биле изложени на закани со ножеви и огнено оружје и биле принудувани да работат без соодветен надомест.
Италијанските власти истражуваат дали случајот е поврзан со пошироки конфликти меѓу групи мигранти кои работат во земјоделскиот сектор во јужна Италија. Според медиумите, во последните месеци во регионот биле регистрирани повеќе подметнати пожари на возила што ги користеле земјоделски работници.
