Студентите по упадот во „Информер“: „Не поддржуваме упади во медиуми, ќе ги ослободуваме преку Собранието“

Студентите во блокада во Србија јавно се оградија од упадите во медиумски редакции и институции, по случувањата во Белград за време на прославата на изборната победа. Тие порачаа дека не поддржуваат такви постапки, ниту повикуваат на нив, нагласувајќи дека борбата за слободни медиуми ќе ја водат преку институциите.

Во објава на социјалната мрежа Икс, студентите ги повикаа граѓаните по завршувањето на прославата на Славија мирно да се разотидат и да се вратат во своите домови.

— реклама —

„Ја разбираме среќата, емоциите и потребата по сè што поминавме конечно да ја прославиме победата. Но сега е важно да останеме достоинствени и одговорни“, порачаа студентите.

— реклама —

Тие нагласија дека изборниот успех не смее да биде повод за упади во медиуми и државни институции.

„Не поддржуваме упади во медиуми и институции, ниту повикуваме на нив. Медиумите ќе ги ослободуваме во Собранието, преку институционална борба за слободно и професионално новинарство“, се наведува во нивната порака.

— реклама —

Обраќањето доаѓа по инцидентот во редакцијата на „Информер“, за кој Александар Вучиќ претходно изјави дека претставува напад врз слободата на новинарството. Тој ги обвини Европската Унија и новинарските здруженија дека молчат за случувањата.

Со својата објава, студентското движење јасно се дистанцира од упадите, истовремено најавувајќи дека промените во медиумскиот сектор ќе ги бара преку собраниски и институционални механизми.

„Победата ја извојувавме заедно, да го зачуваме нејзиното достоинство“, порачаа студентите во блокада.