Студентите поднесоа тужба за субвенционираниот оброк, Јаневска вели дека се водат преговори за нов модел

Форумот за образовни промени (ФОП), во име на шестмина студенти свои членови, поднесе тужба против Министерството за образование и наука пред Управниот суд поради неусогласувањето на износот на субвенционираниот студентски оброк со растот на животните трошоци. Од Форумот сметаат дека зголемувањето е законска обврска, а не прашање на добра волја на институциите.

„Да бидеме јасни, висината на субвенционираниот студентски оброк не е прашање на ретроградниот Меркур или прашање на милостина на Владата и на Министерството за образование и наука кон студентите, ниту на добрата волја или расположението на министерката Весна Јаневска, туку е законска обврска и службена должност“, изјави претседателот на Форумот, Бленди Ходаи.

— реклама —

Според ФОП, Министерството три фискални години не го усогласило дневниот износ од 140 денари со растот на животните трошоци. Од Форумот пресметале дека на околу 30.000 студенти им следуваат по 100 евра, поради што бараат средствата да им бидат исплатени ретроактивно.

— реклама —

Во меѓувреме, Националното студентско тело, во кое неформално се организирани студенти од седум универзитети во Скопје, Тетово и Штип, уште во септември побара од Министерството зголемување на субвенционираниот оброк од 140 на 200 денари.

Студентите сметаат дека сегашниот износ не ги покрива нивните потреби.

— реклама —

Министерката за образование и наука, Весна Јаневска, тврди дека Министерството разговара со студентите за воведување нов модел на поддршка, сличен на оној во Словенија. Предвидено е субвенцијата да се користи преку ваучери во одредени угостителски објекти и продажни места за храна.

— реклама —

Јаневска тврди дека извештаи изработени и во соработка со странски партнери покажуваат дека средствата не се користат целосно за здрава исхрана. Таа посочи дека дел од студентите ги трошат за други намени, поради што Министерството смета дека е потребен поинаков систем.

Министерката потсети дека во 2023 година бил зголемен студентскиот оброк, а по преземањето на власта во 2024 година, Министерството започнало разговори со студентите за решенија за 2025 година. Според неа, тогаш било постигнато заедничко решение, а сега се водат нови преговори за промена на моделот. Таа очекува и овојпат да биде постигнат договор.