(Видео) Студентите со самостојно мнозинство во Србија: 139 пратеници според ЦеСИД и Ипсос

Студентската изборна листа „Студентите победуваат“ освоила 139 пратенички мандати на предвремените парламентарни избори во Србија, додека листата на Александар Вучиќ добила 104 мандати, покажуваат првите процени на Центарот за слободни избори и демократија (ЦеСИД) и агенцијата Ипсос, по обработени 56 проценти од избирачките места.

— реклама —

Според овие процени, студентската листа обезбедува самостојно парламентарно мнозинство, бидејќи за формирање мнозинство во Народното собрание на Србија, кое брои 250 пратеници, потребни се најмалку 126 мандати.

— реклама —

Резултатите беа објавени откако Александар Вучиќ јавно го призна изборниот пораз, соопштувајќи дека неговата листа освоила приближно 1,72 милиони гласови, наспроти околу 2,2 милиони за студентската листа.

„Јасно е дека изгубивме. Сè уште ги немаме конечните резултати, но според досегашните стратифицирани примероци освоивме околу 1,72 милиони гласови, а студентската листа околу 2,2 милиони“, изјави Вучиќ во изборниот штаб на Српската напредна странка.

— реклама —

Тој процени дека неговата политичка опција ќе има околу 105 пратеници, додека студентската листа ќе освои приближно 136 мандати.

Процените на ЦеСИД и Ипсос покажуваат нешто поголема предност за студентите, со 139 мандати, што би им овозможило самостојно формирање парламентарно мнозинство.

Конечните резултати и распределбата на пратеничките мандати треба да ги потврди Републичката изборна комисија (РИК), која постепено ги објавува податоците од избирачките места