Министерството за внатрешни работи соопшти дека до Основното јавно обвинителство за гонење организиран криминал и корупција поднело кривични пријави против три лица, осомничени за кривичните дела „давање награда за противзаконито влијание“, „примање награда за противзаконито влијание“ и „примање поткуп“.
Првопријавена е 27-годишна битолчанка, студентка на Стоматолошкиот факултет, второпријавен е 56-годишен професор од Гостивар и поранешен потпретседател на Стоматолошката комора, а третопријавен е 63-годишен скопјанец, претседател на Комисијата за полагање стручен испит за здравствени работници од областа на стоматологијата при Министерството за здравство.
Според МВР, студентката во декември 2025 година, по претходна комуникација преку апликацијата „Вибер“, му префрлила парични средства на професорот со цел тој да влијае врз претседателот на испитната комисија. Како резултат на тоа, таа го положила стручниот испит на 17 декември 2025 година и добила уверение, иако, според сомнежите, не го поседувала потребното знаење.
Во рамки на истрагата, полициски службеници извршиле претреси кај второ- и третопријавениот, при што биле пронајдени и одземени 65.280 евра, 29.840 швајцарски франци и 161.500 денари.
Истрагата за случајот продолжува под раководство на надлежното обвинителство.
