Досега најчесто се сметаше дека вештачката интелигенција најголема закана претставува за младите луѓе кои штотуку влегуваат на пазарот на труд. Сепак, ново истражување покажува дека технологијата сè повеќе ги погодува и работниците што се блиску до пензионирање.
Студијата на Центарот за истражување на пензискиот систем при Бостонскиот колеџ, предводена од професорот по економија Џефри Санзенбахер, анализирала податоци за американскиот пазар на труд и влијанието на вештачката интелигенција врз работниците постари од 55 години.
Истражувањето ги споредило податоците за вработеноста со индекс што покажува колку одредени професии се изложени на автоматизација со вештачка интелигенција. Анализата опфатила период пред и по појавата на ChatGPT во 2022 година.
Резултатите покажуваат дека пред појавата на ChatGPT, повозрасните работници на високообразовни и канцелариски работни места, како што се програмерите или даночните советници, почесто останувале подолго во работен однос отколку лицата што извршуваат физички работи.
По 2022 година, оваа предност значително се намалила. Истражувачите забележале пораст на бројот на работници постари од 55 години кои ги напуштаат канцелариските работни места и остануваат без работа, наместо да се пензионираат.
Според авторот на студијата, тоа укажува дека сè повеќе искусни работници се оттурнати од пазарот на труд пред да бидат подготвени за пензија, а нивните шанси повторно да се вработат се значително помали.
Податоците покажуваат дека бројот на програмери постари од 55 години кои ја напуштиле работата меѓу 2014 и 2025 година се зголемил за повеќе од 25 проценти, додека кај сметководителите и ревизорите растот изнесува околу 22 проценти. За споредба, кај физичките професии, како што се молерите, зголемувањето било околу два процента.
Истражувањето отвора прашање како ќе изгледа идниот пазар на труд ако истовремено се намалуваат можностите за вработување на младите, а искусните работници сè почесто остануваат без работа поради напредокот на вештачката интелигенција.
