Судењето за „Пулс“ продолжува: Почнува изведување на материјални докази

Судењето за пожарот во „Пулс“ во Кочани, во кој животот го загубија 63 лица, а над 200 беа повредени, продолжува утре во судницата во Идризово со влез во нова фаза од постапката.

— реклама —

Како што информираат од Јавното обвинителство, на претстојното рочиште се очекува да заврши сослушувањето на сведоците предложени од обвинителството, по што ќе започне изведувањето на материјалните докази. Предвидено е уште тројца оштетени да дадат исказ, но нивното присуство е неизвесно, па доколку не се појават, ќе бидат прочитани нивните претходно дадени изјави.

Во новата фаза, доказната постапка ќе започне со обдукциските наоди изготвени од Институтот за судска медицина при Медицинскиот факултет во Скопје. Овие докази, како што посочуваат од обвинителството, треба да дадат одговори на клучни прашања поврзани со причините за смртта на жртвите, вклучително и евентуалното присуство на токсични гасови како водороден цијанид.

— реклама —

Од обвинителството наведуваат дека сите релевантни анализи се веќе извршени и ќе бидат презентирани од страна на вештите лица во судницата. Дополнително, ќе се разгледуваат и други околности поврзани со трагедијата, како условите во објектот, бројот на присутни и текот на настаните.

— реклама —

Во рамки на доказната постапка ќе бидат презентирани и видеоматеријали, при што нема да се прикажуваат целосни снимки, туку селектирани делови кои се релевантни за обвинителниот акт. Можно е дел од рочиштата да се одржат без присуство на јавноста, доколку материјалите се оценат како чувствителни и потенцијално деградирачки за жртвите.

Начинот на изведување на доказите ќе зависи од договорот меѓу странките и одлуката на судот, но од обвинителството предлагаат доказите да се внесуваат во записник со дополнително објаснување на нивниот контекст.

— реклама —

Пожарот во „Пулс“ избувна на 16 март 2025 година за време на настап на музичка група и претставува една од најтешките трагедии во поновата историја на земјата. Во случајот се обвинети 35 физички и три правни лица, кои на почетокот на судскиот процес се изјаснија дека не се чувствуваат виновни.