Судот во Кочани ја одби Ива Михајлова: Нема да може да го следи судењето преку видеоврска од Бугарија

Основниот суд во Кочани го одби барањето на Ива Михаилова преку конференциска врска да учествува во судската постапка што се води против неа. Судницата одлучила судењето да продолжи во нејзино отсуство, а денеска се сослушуваат вештаци на предлог на одбраната.

— реклама —

Судијата Спиро Борисов образложил дека Законот за кривична постапка предвидува ваква можност во ситуации кога треба да се испитаат сведоци или вештаци, а не и обвинети лица. Поради тоа, барањето на Михаилова за учество преку видеоврска не било прифатено.

— реклама —

Ива Михајлова избега од Македонија во Бугарија на 11 октомври на засега непознат начин, а нејзиниот адвокат Николај Димитров изјави дека ѝ помогнал.

И Димитров и Михајлова пред камерите на бугарските телевизии дадоа нелогично образложение дека границата ја поминале со лична карта, иако ниту во македонскиот ниту во бугарскиот граничен систем Михајлова не е регистрирана.

— реклама —

Ива Михајлова е обвинета за сообраќајка со смртни последици, во која загина младиот Бесим Дурмиши од скопското село Љуботен. Сообраќајката се случи на 7 октомври 2025 година на патот Кочани-Штип. Семејството на загинатиот Дурмиши присуствува на рочиштата во Kривичниот суд во Кочани, каде што ѝ се судеше на Михајлова.

— реклама —

Михајлова беше под активна судска забрана да ја напушта Македонија и беше ставена на „стоп-листата“ на сите гранични премини.