Самостојноста и независноста на судовите мора да се почитуваат, а ниту еден државен орган не смее да го прејудицира исходот на судска постапка, порачаа Судскиот совет и Здружението на судиите во заедничко соопштение по потегот на Уставниот суд да пријави судија од Основниот граѓански суд Скопје во обвинителството.
Од двете институции нагласуваат дека судовите не се задолжени да спроведуваат одлуки на други државни органи, туку судат самостојно и независно врз основа на Уставот, законите и ратификуваните меѓународни договори.
Тие го признаваат уставниот статус на Уставниот суд и фактот дека неговите одлуки се конечни и извршни, но истовремено укажуваат дека мора да се почитуваат и независноста на судовите, законскиот тек на постапките и правото на користење правни лекови.
Во конкретниот случај, решението П4-240/22 од 4 мај 2026 година на Основниот граѓански суд Скопје не е правосилно. Против него е поднесена жалба, по која треба да одлучи надлежниот второстепен суд. Оттаму, Судскиот совет и Здружението на судиите сметаат дека оценката на законитоста на првостепената одлука му припаѓа на второстепениот суд.
Според нив, институционалното постапување во врска со неправосилна судска одлука мора да биде внимателно и воздржано, за да не се создаде впечаток дека се влијае врз исходот на постапката или врз судиите што одлучуваат.
Предметот се однесува на Наташа Стојановска, новинарка која била присутна во Собранието на 27 април 2017 година за да известува за изборот на претседател на Собранието. По насилниот упад, таа била изложена на закани и заплашување и била спречена да ја извршува својата професионална задача.
Уставниот суд утврдил повреда на нејзиното право на слободно изразување, оценувајќи дека државата не ја исполнила обврската да ја заштити и да ѝ овозможи непречено информирање на јавноста. Како правна основа се наведени член 16 и член 110 алинеја 3 од Уставот, како и член 10 од Европската конвенција за човекови права.
