Индонезиските власти ги засилија напорите за ставање под контрола на пожарите во шест провинции, при што се користат и авиони за засејување облаци со цел да се предизвика дожд и да се намали загадувањето на воздухот што се шири низ регионот.
Земјата годинава се соочува со подолг и поинтензивен сушен период, додека временскиот феномен Ел Нињо дополнително го зголемува ризикот од суша, шумски пожари и загадување.
„Во состојба на готовност сме бидејќи временските услови навистина овозможуваат пожарите да станат поголеми“, изјавил министерот за безбедносни прашања Џамари Чаниаго. Според него, постојат индикации дека Ел Нињо можеби веќе го достигнал најинтензивното ниво во земјата.
Како приоритетни се издвоени провинциите Риау, Џамби, Јужна Суматра, Западен Калимантан, Централен Калимантан и Јужен Калимантан. Пожари избувнале и во други делови на земјата, вклучително и на островите Јава, Папуа и Нуса Тенгара.
Од индонезиската организација за заштита на животната средина WALHI велат дека пожарите најчесто се поврзани со уништувањето на шумите за создавање плантажи за производство на палмино масло и отворање рудници. Со тоа почвата станува посува и поподложна на палење.
Еколошкиот активист Дана Прима Тариган предупреди дека ситуацијата дополнително ја влошува Ел Нињо, кој го намалува количеството врнежи, го продолжува сушниот период и ја намалува количината вода во екосистемот.
