Шведскиот премиер Улф Кристерсон предизвика лавина реакции откако во интервју призна дека повремено се консултира со ChatGPT за стратегии за водење на државата, пишува Gizmodo.
„Го користам прилично често. Ако не за ништо друго, тогаш за второ мислење – што направиле другите? Дали треба да мислиме спротивно? Такви прашања“, изјави Кристерсон.
Изјавата наиде на остри критики од експерти и медиуми. Вирџинија Дигнум, професорка за одговорна вештачка интелигенција на Универзитетот Умео, предупреди дека ваквиот пристап е „лизгав терен“.
„Колку повеќе се потпираме на вештачка интелигенција за едноставни работи, толку е поголем ризикот од преголема доверба во системот. Не гласавме за ChatGPT“, истакна таа.
Новинарката Сигне Кранц од Aftonbladet оцени дека управувањето со држава со помош на chatbot „не е патот по кој треба да оди западната цивилизација“. Таа потсети дека ваквите системи имаат тенденција да напишат она што корисникот сака да го чуе, наместо она што навистина треба да го чуе, што кај политичарите може да доведе до потврдување на веќе постоечките ставови, наместо добивање објективен совет.
Не е јасно дали Кристерсон навистина се потпира на ChatGPT во извршувањето на своите должности или само сакал да звучи современо со споменување на популарната технологија. Сепак, случајот ја отвори дебатата за тоа колку далеку може да оди ваквата практика и како влијае на способноста за самостојно донесување одлуки.
