Кардиоваскуларните заболувања и натаму се водечка причина за смртност во Македонија. Минатата година од заболувања на кардиоваскуларниот систем починале 6.888 лица, што претставува 34 отсто од вкупниот број смртни случаи, информираше директорката на Институтот за јавно здравје, Марија Андоновска.
По повод Светскиот ден на срцето, ИЈЗ организираше бесплатни превентивни прегледи за граѓаните, кои имаа можност да го проверат крвниот притисок, шеќерот во крвта, висината и тежината, како и да добијат совети од стручни лица.
Пунктот го посети и министерот за здравство, Сашо Клековски, кој ја истакна важноста на превенцијата и раното откривање на кардиоваскуларните заболувања.
Клековски посочи дека тие се меѓу главните придонесувачи за предвремена смртност кај лицата на возраст од 30 до 70 години. Особено го издвои високиот крвен притисок, кој може да влијае врз срцето, бубрезите и мозокот, а во комбинација со нерегулиран дијабетес дополнително го зголемува ризикот.
Тој апелираше граѓаните редовно да го контролираат крвниот притисок и да ја земаат пропишаната терапија според советите на лекарите.
Министерот најави и промени во следењето на резултатите од систематските прегледи на работоспособното население. Со претстојните измени на Законот за медицинските евиденции ќе се разгледува можноста резултатите од прегледите да бидат интегрирани во медицинското досие на пациентите.
Клековски повторно го отвори и прашањето за мерење на крвниот притисок и шеќерот во аптеките, под регулирани услови и со соодветно обучени здравствени работници.
Кардиоваскуларните заболувања се меѓу водечките причини за смртност и во Европската Унија. Според Евростат, околу 1,6 милиони луѓе годишно умираат од болести на срцето и циркулаторниот систем, што претставува 32,5 отсто од сите смртни случаи.
