Денес се одбележува Светскиот ден на срцето, годинава под слоганот „Болеста на срцето може да биде незабележлива: Фати го ритамот на срцето! Не пропуштај ниту едно отчукување!“.
Во центарот на вниманието се препознавањето на скриените симптоми, информирањето и едукацијата на населението, како и активности насочени кон носителите на одлуки за обезбедување достапна кардиолошка нега и превентивни прегледи.
Светскиот ден на срцето е воспоставен во 2000 година со цел да се подигне свеста за значењето на здравјето на срцето и крвните садови, како и за мерките за спречување на кардиоваскуларните заболувања.
Според податоците на Светската федерација за срце и Светската здравствена организација, кардиоваскуларните заболувања се водечка причина за смртност во светот, со околу 20,5 милиони смртни случаи годишно.
Се проценува дека повеќе од 620 милиони луѓе денес живеат со кардиоваскуларен проблем. Меѓу најчестите состојби се акутниот инфаркт на миокардот и мозочниот удар.
