Регионалниот директор на Светската здравствена организација за Африка, Мохамед Јакуб Џанаби, предупреди дека би било сериозна грешка да се потцени ризикот што го носи актуелната епидемија на ебола.
Џанаби истакна дека само еден случај би можел да доведе до ширење на вирусот надвор од границите на Демократска Република Конго и Уганда.
„Би било голема грешка да се потцени ситуацијата, особено кога станува збор за вирусот од сојот Бундибугио, за кој немаме вакцина“, изјави Џанаби во интервју за Ројтерс во седиштето на СЗО во Женева.
Тој повика на меѓународна соработка за ситуацијата да биде ставена под контрола.
Џанаби додаде дека епидемијата на ебола во Конго добила релативно мало глобално внимание во споредба со неодамнешната епидемија на хантавирус, која ги погоди патниците на крузер од 23 држави, меѓу кои и големи светски сили.
Според податоците на Министерството за здравство на Демократска Република Конго, досега се регистрирани 670 сомнителни случаи на зараза, од кои 61 се потврдени, додека се пријавени 160 смртни случаи.
Два потврдени случаи се регистрирани и во соседна Уганда.
