Заврши судењето за тројцата полицајци од Кочани, од Здружението 16 март порачаа: Ова е почеток, не крај

Вчера заврши судењето против тројцата полициски службеници од Кочани обвинети за неизвршување службена должност во случајот поврзан со дискотеката „Пулс“. Судот најави дека пресудата ќе биде објавена на 5 мај. Обвинетите се товарат дека при контроли во угостителскиот објект не постапиле согласно законските обврски, со што, според обвинението, овозможиле неправилности и прибавување корист за правно лице.

Од „Здружението 16 март“ велат дека очекуваат правда за 63-те жртви и нивните семејства.

— реклама —

„Заврши судскиот процес против тројцата полициски службеници од Кочани. За некого ова е само уште еден предмет. За нас – ова е првата разврска во борбата за правда за нашите најмили.

Чекаме пресуда!

Со тежина во срцето, со болка што не поминува и со надеж што не смееме да ја изгубиме. Се надеваме дека судот ги видел сите пропусти, сите грешки, сите моменти каде системот потфрли – и дека ништо нема да остане занемарено. Бидејќи зад овој случај не стојат бројки.

Стојат 63 животи, 63 семејства што секој ден живеат со празнина што никогаш нема да се пополни.

Ова не е крај. Ова е почеток. Ќе останеме тука. Ќе гледаме. Ќе паметиме. И нема да престанеме да бараме:

Вистинска, целосна и заслужена правда!“, стои во објавата.

— реклама —

Претходно, со изнесување на завршните зборови во Основниот кривичен суд Скопје, заврши судскиот процес против тројцата полициски службеници од Кочани – Кире Богатинов, Горан Лазаров и Александар Темелков. Судот најави дека пресудата ќе биде соопштена на 5 мај.

Обвинителството побара осудителна пресуда, наведувајќи дека обвинетите во период од октомври 2023 до февруари 2024 година свесно ги занемарувале службените должности при контролите во кабарето „Пулс“, со што, според обвинението, овозможиле незаконска корист и избегнување на санкции.

— реклама —

Одбраната, пак, побара ослободителна пресуда, тврдејќи дека нема докази за директна умисла и дека постапувањето на обвинетите било професионално.

— реклама —

Клучниот спорен момент во постапката е внесувањето на неточни податоци во службените записници, што, според обвинителството, довело до неказнување на вистинските прекршители.

Овој предмет е првиот судски процес поврзан со трагедијата во дискотеката „Пулс“ во Кочани, во која загинаа 63 лица, а над 200 беа повредени, и се смета за почеток на пошироката правна разрешница за еден од најтешките настани во поновата историја.