Телото на Ратко Младиќ денеска пристигнува во Србија, Вучиќ најави големи безбедносни мерки

Претседателот на Србија, Александар Вучиќ, изјави дека телото на Ратко Младиќ, кој почина во Хаг, се очекува во доцните попладневни часови да пристигне во Србија.

„Според моите последни информации, телото е преземено и се очекува во доцните попладневни часови да пристигне во Србија“, рече Вучиќ, одговарајќи на новинарско прашање.

— реклама —

Тој додаде дека најважно е надлежните служби да обезбедат целиот процес да помине без проблеми, оценувајќи дека пред нив претстои сложена безбедносна задача.

„Пред нашите служби е многу тешка и сложена задача. Безбедносните проценки на БИА и на другите служби се движат во рамките на неколку десетици илјади луѓе, па затоа безбедноста е приоритет“, изјави српскиот претседател.

— реклама —

Вучиќ не сакаше да открива детали за погребот, упатувајќи ги новинарите до семејството на Младиќ.

„Нема да одговарам на вакви прашања. Семејството на генералот Младиќ ќе ѝ се обрати на јавноста и ќе ги соопшти сите детали“, рече тој.

— реклама —

Според проценките на безбедносните служби и Министерството за внатрешни работи, на погребот би можеле да присуствуваат десетици илјади луѓе. Вучиќ посочи дека поради тоа, како и поради локацијата на гробиштата и местото на погребот, обезбедувањето ќе биде особено сложено.

Тој наведе дека проценките се направени од Безбедносно-информативната агенција, Воено-безбедносната агенција, Воено-разузнавачката агенција и МВР.

— реклама —

„Мораме да обезбедиме сè. Пред нашите служби е многу сложена задача и ќе ги употребиме сите расположливи сили за да ја гарантираме безбедноста на сите граѓани“, истакна Вучиќ.

Тој додаде дека државата ќе обезбеди логистичка и транспортна поддршка и ќе преземе мерки за зачувување на јавниот ред, мир и безбедност.