Температурите на европските мориња рушат рекорди: На некои места се над 6 степени над нормалата

Европските мориња годинава бележат исклучително високи температури, а научниците предупредуваат дека главниот фактор зад ваквото затоплување се климатските промени. Според анализата на меѓународен тим истражувачи од мрежата World Weather Attribution (WWA), температурите на површината на морето долж речиси целото европско крајбрежје се над просекот за периодот од 1990 до 2020 година.

— реклама —

Меѓу најпогодените области се западниот дел на Средоземното Море, Бискајскиот Залив и Пиринејскиот Полуостров. На одделни места температурата на морето е дури и повеќе од шест Целзиусови степени над вообичаеното ниво.

Истражувачите ги споредиле јунските температури на површината на морето со климатски модели за да утврдат колкав е уделот на глобалното затоплување. Според нивните пресметки, климатските промени ја зголемиле просечната температура за околу два степени во Средоземното Море, за 1,4 степени во Бискајскиот Залив и долж западниот брег на Пиринејскиот Полуостров, како и за 1,3 степени во морето околу Ирска и западниот брег на Велика Британија.

— реклама —

Топлотните бранови годинава зафатиле околу 90 отсто од крајбрежјето на Бискајскиот Залив и Пиринејскиот Полуостров, како и околу 80 отсто од западниот дел на Средоземното Море. Научниците проценуваат дека без затоплувањето предизвикано од човечката активност, овие проценти би биле околу 40 отсто во двете области.

— реклама —

Затопленото море може сериозно да влијае врз морските екосистеми и синџирите на исхрана, а последиците може да се одразат и врз популациите на морските цицачи и птици.

Промените веќе ги забележуваат и рибарите. Во југозападна Англија, од 2025 година е регистрирано значително зголемување на бројот на октоподи, вид кој вообичаено живее во потоплите води околу северна Африка.

— реклама —

Истражувачите предупредуваат и дека повисоките температури на морето можат да придонесат за создавање посилни бури. Како пример ја посочуваат смртоносната поплава што ја погоди шпанската покраина Валенсија во 2024 година.