Од опозициската Социјалдемократски сојуз на Македонија преку соопштение остро ја критикуваа најавената реконструкција на Владата, оценувајќи дека станува збор за обид за „префарбување“ на коалицијата со цел продолжување на истите политики.
Во партиското соопштение, СДСМ наведува дека првичните разговори меѓу ВМРО-ДПМНЕ и ЗНАМ за реконструкција на Владата се завршени, а дека сега следуваат финалните консултации.
Според СДСМ, целта на реконструкцијата не е подобрување на работата на Владата, туку, како што велат, „мачкање очи на граѓаните“ и продолжување на, како што ги нарекуваат, криминалните тендери и коруптивните практики.
Од партијата оценуваат дека економската состојба во државата е сериозна и посочуваат дека буџетот е под силен притисок, дека странските инвестиции се намалени, а животниот стандард на граѓаните е влошен.
„Наместо да се соочат со овие проблеми, тие прават театар наречен реконструкција“, наведуваат од СДСМ.
Од опозициската партија додаваат дека граѓаните не очекуваат само кадровски промени, туку, како што велат, суштински реформи, борба против корупцијата и подобрување на животниот стандард.
СДСМ, исто така, порача дека вистинска реформа, според нив, е можна само со реформирано правосудство и целосна одговорност за криминалот и корупцијата.
