Тензии во Тирана на 94. протест: Демонстрантите се обидоа да влезат во Владата, полицијата употреби солзавец

Тензиите ескалираа синоќа во Тирана за време на 94. антивладин протест, на кој учесниците повторно побараа оставка од премиерот Еди Рама и промени во институциите и законодавството.

— реклама —

Демонстрантите се обиделе насилно да влезат во зградата на владата, откако дознале дека Рама се наоѓа во својот кабинет. По неколку предупредувања преку мегафони, полицијата употребила солзавец за да ги растера насобраните граѓани.

Според медиумите во Тирана, неколку полициски службеници биле повредени откако демонстрантите кон нив фрлале тврди предмети. Полицијата го обезбедила подрачјето, а во акцијата биле вклучени и припадници на специјалната единица „Ренеа“.

— реклама —

Протестот се одвивал на две локации. Додека едната група демонстранти се наоѓала пред кабинетот на премиерот и одржувала говори, друга група се обидела да стигне до просториите на владата преку еден од задните влезови.

— реклама —

По судирите, дел од демонстрантите се упатиле кон полициската станица, барајќи ослободување на 11 лица кои биле приведени поради насилно однесување. Рама подоцна ја напуштил владината зграда под засилено полициско обезбедување.

Протестите започнаа поради противењето на планираната туристичка инвестиција во Звернец и стравувањата за нејзиното влијание врз животната средина. Со текот на времето, барањата се проширија и на оставка на Рама, формирање преодна влада, промени во изборниот закон и укинување на измените поврзани со заштитените подрачја.

Демонстрантите истакнуваат и загриженост поради корупцијата, ограничените можности за вработување и масовното заминување на младите од земјата.